WEB GUNEAK ARAKATZEN

Artea eta hezkuntzarekin lotutako web gune batzuk bisitatzeko aukera izan dugu. Harrituta geratu gara erabat! Zenbat baliabide ote daude artea eta hezkuntzari lotutakoak?
Hauek ere ez genituen ezagutzen eta bisitatu ondoren zur eta lur geratu gara. Artea lantzeko eta zaletasun hori bultzatzeko baliabide asko daudela ikusteko aukera izan dugu eta egia esan denbora gehiago ere beharko genuke web gune horietan benetan dagoena aztertu eta hausnartzeko.
Hala ere lehenengo bistadizoan pertsonalki nahiz eskola bateko proiektu gisara baliabide ezin hobeak daudela ikus dezakegu. Guk jakin gabe, dagoeneko ideiak eta proiektuak sortuak daude eta bertatik ikastea eta ahal bada, bertakoa hobetzeko aukera ezin hobea eskaintzen digute. Gainera, web gune asko norbere beharretara egokitzen da, izan ere, askok, Guggenheim museoko orriak adibidez, bezero tipologiaren araberako eskaintza egiten du Haurrentzako adibidez, jolasak daude, inprimatu eta koloreztatzeko plantillak etab... Horretaz aparte, hainbat artistei ikasleek egindako elkarrizketak ere ikusgai daude eta horiek ere oso baliagarriak dira, mundu horretara gerturatze aldera.
Bestalde, web gune hauetan artea ez da gauza isolatu bat. Arteak gure eguneroko errealitatearekin, bizitzarekin lotura zuzena du eta lotura horren isla da hain zuzen ere artea ikasbidea web gunea. Bertan ikastetxeetan lantzeko unitate didaktiko batzuk eskaintzen dira eta artearekin lotura zuzena izateaz gain, matematika, literatura eta beste hainbat ikasgaiekin lotura egiten da.
Web gune hauek elkartrukerako gune direla esan beharra dago; izan ere, guztiek eskaintza bat, azalpen bat egiten dute eta proiektu ezberdinen erakusleiho denez, proiektu horiek beste hainbat tokitan martxan jarri edo proiektuak osatu edo hobetzeko aukera ematen dute.
Bestelako hainbat web gunetan ere ibili gara saltseatzen. Egia da gehienak helduei zuzenduta daudela, adibidez, Kubo-kuntxaren web gunean erakusketen informazioa ematen da baita Artium museoak ere baina tartean badaude haurrei zuzendurikoak ere, Pepe Caceres eta Artekids esaterako. Bertan haurrekin nola lan egiten den ikus dezakegu eta oso interesgarria iruditu zaigu.
Beraz, ezer egiten hasteko ez dago hutsetik abiatu beharrik; hala nahi bada noski! kontua da, baliabide ugari ditugula gure inguruan eta askotan ezagupen faltagatik ez ditugula baliatzen. Beraz, aprobetxatu dezagun inguruan duguna eta besteek egiten dutena ere baliagarri eta egokia ikusten badugu, aprobetxa dezagun!

KOLDO MITXELENARA BISITA

Pasa den ostiralean, martxoaren 13an, Koldo Mitxelenara joan ginen. Egiten zuen eguraldiarekin bidean desbio bat hartzea ere barkatzeko modukoa izango zen, baina, ez, ez ginen desbideratu eta txintxo txintxo han ginen Koldo Mitxelenako atatian esandako orduan.

Behin barruan, lehendabizi bertako pedagogia saileko koordinadorak, uste dut, beno berdin dio, neska maja batek museo desberdinen inguruko azalpenak eman zizkigun. Munduan zehar museo desberdinetan burutzen ziren zenbait proiekturi buruzko zertzelada batzuk eman zizkigun, azaletik, eta gero link desberdin asko eman zizkigun, eta bertan informazio interesgarria bilatu dezakegu. Egia esan, oraindik ez ditugu link horiek gehiegi begiratu, baina, egun hauetako batean emango diegu begirada sakonago bat eta topatzen dugunaren berri emango dugu.
Azalpenen ondoren, erakusketa aretora joan ginen eta han Aitor Ortizen lana ikusteko aukera izan genuen. "GAP>espazio sorra" izena zuen erakusketak eta areto honetarako bereziki prestatutako erakusketa bat da. Argazkiz osatutako erakusketa da, argazkiak eta argazki bidez osatutako eskultura batzu ere ikus daitezke.
Hasieran libreki erakusketa osoa ikusteko aukera izan genuen eta jarraian azalpenak eman zizkiguten, Aitor Ortizen lanaren inguruan zer zen berak lan hauekin transmititu nahi zuena, zein zen bere lan filosofia. Aitor Ortizen lanak arkitektura munduarekin izan du beti lotura. Bere lana nolabait definitzeko, eraikuntza fotografikoak direla esaten da eta ez eraikuntzen argazki hutsak. Benetan ikusgarria zen nola argazkietan argiarekin jokatuz hirugarren dimentsio hori perzibitu zitekeen, argazkiek sakonera bat zutela zirudien.
Argazki honetan bereziki, bertara gerturatu ahala barruan zeundela zirudien eta halako batean hor goitik, zerurantz edo aterako zinela. Ikusgarria! Besteak ez ditugu kontatuko, bakoitzak bertara joan eta ikus ditzala, bizi ditzala!

Ikusi nahi duenak oraindik badu aukera ikusteko izan ere erakusketa hau martxoaren 28rarte zabalik egongo da, asteartetik larunbatera 10.30etatik 14.00etara eta 16.00etatik 20.30etara. Merezi du bertara gerturatu eta lanak ikustea.
Ah! Erakusketa aretoa Koldo Mitxelenara sartu orduko eskubiko eskailerak jeitsi eta hortxe dago! Ez da liburutegi barrura sartu behar. Ondo pasa eta disfrutatu.

TEKNOGRAMA

Aste batzuk pasa dira teknogramarekin lanean hasi ginenetik. gure autobiografiak errepasatu ondoren nahikoa garbi genuen gure bideoan plasmatu nahi genituen ideiak zein ziren. Behin gidoia antolaturik grabazioak egiteari ekin genion. Saiakera batzuen ondoren nahikoa lan txukuna egin genuelakoan gure bideoa editatzeko asmotan lanean jarri ginen.
Dena oso ondo ateratzen ari zen, baina... izan ere zer da istorio bat bainarik gabe ezta! Ba hori, bideoa editatzeko lanean hastera gindoazela bideo editatzaileak ez zituen gure grabazioen formatoak irakurtzen, toma! Orain, bideo guztiei formatoa aldatu beharko!
Internetetik programa jeitsi eta egin genuen hori ere eta berriro bideoa editatzeko prest ginenean zer konturatuko eta bideoak formatuz aldatu bai, baina, era berean moztu egin zituen programa hark, kaka zaharra! Berriro hastera! Beste saikera baten ondoren, formatoak aldatu eta lanerako prest ginenean, gelak ordenagailuak ez zituen gure bideoak irakurtzen. Baina oraingoan ondo zeuden, etxean konprobatu genuen! Hau ez da posible! Azkenean gelako ordenagailuak haizea hartzera bidali eta geure ordenagailuan egitea erabaki genuen. Gaur, azkenean, asko kosta ondoren lortu dugu gure bideoari itxura ematea eta egia esan oso gustora gelditu gara azken emaitzarekin, gure lehen bideoa izateko ez dago gaizki. Bideoa ikusi nahi baduzue klikatu irudian.

Zer, ezin dela bideoa ikusi? Ziur al zaudete? Saiatu, saiatu berriro !

Ezetz! Broma bat zen. Bideoa ez dago oraindik ikusgai, azken ikutuak eta erremateak falta zaizkio baina laister jarriko dugu gure blogean. Hala ere eskertzen da interesa. Izan pazientzia pixka bat, egitea kosta zaigunarekin ezingo genuen ba zuentzat hain erraza utzi ezta? Emozio pixka bat ere ez dago gaizki. Laister izango duzue teknogramaren jarraipena gure blogean.

JARRAITUKO DU...

ANDRES NAGELen erakusketa ikusgai

Ikusi dugun bideoan Zuhaizti ikastetxeko haur batzuk Andres Nagelek egindako obren erakusketa bat ikustera joan zireneko esperientzia kontatzen digu. Honela, erakusketa hori bisitatu eta haurrek ikusten zutenaren inguruko hipotesiak eta irudipenak azaldu ondoren, helburua ikastetxean zuten pareta huts bat betetzea zen; beti ere haurren sormena eta nahia bultzatuz. Helburu horretara iristeko hainbat bitarteko jarri dituzte: horma baten istorioa kontatzen duen ipuina landu dute , horma betetzeko ideia ezberdinak aurkeztu dituzte, haur eta irakasleen arteko ideia trukaketak burutu dira…

Gure ustez, ideia polita da Haur Hezkuntzako haurrak erakusketa batetara eramatea izan ere, zoritxarrez ez ohiko jarduera izan daiteke beraientzat, interesgarria eta aberasgarria sormena garatzeari begira. Honela, egunero ikusten ez diren objektuak ikus ditzakete aurrek, aurretik definitu gabeko zerbait; beraz, haurrek irudimena erabiliaz zer den asmatu beharko dute, joku bat bailitzan.

Baina bideoa ikusten ari ginen bitartean, une batean, zehazki, eskaileretan zer egin zitekeen hitz egiten ari zirenean, haurrak aspertu samar ere bazeudela iruditu zaigu. Gure ustez, oso positiboa da haurrak horman egin daitekeenaren inguruko proposamenak egitera bultzatzea eta beraien iritzi ezberdinak entzun eta ideia trukaketa egin ondoren guztien arteko adostasun batera iristea baina momento hori gehiegi luzatu denaren sentsazioa geratu zaigu, hau da, motzago ere egin zitekeela iruditu zaigu.

Hala ere, oro har oso positiboa iruditu zaigu haurrak erakusketara eramatea izan ere honela, ikusten dutenaren inguruan hausnarketa egin eta sormena garatzeko aukera ezin hobea iruditzen zaigu eta hori txiki-txikitatik egin beharrekoa da.

SORMENA

"¿Qué me dices de la creatividad? ¿Existe realmente en los niños?

Sherlock Holmes todavía está buscando la creatividad. No sabemos lo que es pero sabemos que existe. Quizá está más disponible de lo se cree y más infravalorada de lo que se piensa."

Escuelas infantiles de Reggio Emilia - La inteligencia se construye usándola.